Bilang pagpupugay sa kabayanihan ng mga sundalong Filipino, muling inaanyayahan ng Armed Forces of the Philippines Educational Benefit System Office o AFPEBSO ang buong kasundaluhan at kanilang mga anak o nakakabatang kapatid na mag-aplay sa mga scholarship program na ibinabahagi ng AFP para sa school year 2006-2007.

Mahigit sa 1,000 scholarship slots mula 97 Educational Benefit Programs sa buong Pilipinas ang ipamamahagi ng AFPEBSO sa mga anak, o kapatid kung sakaling binata pa, ng sundalong namatay, nawala, nasugatan sa pakikipaglaban, o sa mga sundalong kasalukuyang nasa serbisyo, partikular na ang mga may kapansanan. May ilang scholarship slots din ang ibabahagi sa mga anak o nakakabatang kapatid ng namatay sa pakikipaglaban na miyembro ng Citizen Armed Forces Geographical Unit Active Auxiliaries o CAFGU.

Magbibigay ang AFPEBSO ng libreng tuition fee, miscellaneous fee, stipend at iba pang tulong pang-edukasyon sa mga qualified dependents, 21 taong gulang pababa, ng mga sundalo.

Para sa karagdagang impormasyon tungkol sa mga requirements at proseso ng pag-a-aplay, bumisita lamang sa tanggapan ng AFPEBSO sa Camp Emilio Aguinaldo, Quezon City, o tumawag sa 9126922 at 9129606. Ang deadline para sa pagtanggap ng mga aplikante ay hanggang Mayo 03, 2006.